大廟釣魚

今日約咗幾個中學同學仔去釣魚，因為大家都住將軍澳，所以揀去大廟釣魚。

去到嘅時候先知道今日掛一號風球，唔怪得呢兩日咁悶熱。不過聽人講打風前後特別多魚釣，所以對今日都有ｄ期待！

行到落碼頭見人拎住條有三斤重的星鱸！嘩！唔通真係咁好魚，拿拿聲set野釣魚！點知望下個海，唔對路喎，做乜有增油係海面，實係出面ｄ遊艇污染，經水流流埋黎，仲聞到陣機油味，破壞晒個環境。

開竿釣咗一陣，唔妥喎，連泥鯭都唔開口，唔好講話其他魚，真係第一次遇到，我諗同海面嘅油污有關。我睇過釣魚書話，ｄ魚生唔生猛，肯唔肯開口食餌，影響最大係水嘅含氧量，可能層油令氧氣融唔到入水，唔夠氧氣所以ｄ魚唔開口。

過咗一個鐘左右，見個天有黑雲，又開始起風，上天文台睇睇，原來有舊雨雲飄梗過黎，睇黎都幾大雨，我地眼見海面冇乜魚，又準備落雨，所以決定執野暫時避雨。

過咗半個鐘左右，舊雨雲落到黎，都幾大雨。我地係天后廟避雨吹水，半個鐘左右雨就落完，由於進入黃昏的黃金時間，決定再戰大海！

最後係碼頭右邊釣到一條九棍（係後來上網查先知），都幾好力水，總算唔駛「打龜」！

條魚結果攞嚟蒸，都幾鮮甜喎！不過好多骨，網上話最好用黎打魚旦，因為清蒸太多骨。