今日係星期日，諗住過吓釣魚癮，去咗鯉魚門探路。
由三家村避風塘一直行入去，經過海鮮檔，到咗天后廟，由於前面有狗攔路，加上蕉小姐身體不適，唯有折返三家村碼頭。
送走蕉之後，一個人去三家村碼頭釣魚。約下晝四點終，在場所見有十幾人釣魚，非常熱鬧。係開竿時，聽到隔離釣友話今朝有人放生魚，所以今日有大魚釣咁話。我不以為然，始終以放生魚為目標魚總覺得有點不妥．．．
投咗幾次，發現個場唔多石，似沙低，但近岸多魚網／鐵籠，我粗糙估計我比同一個鐵籠掛咗五次，但就係o固個位有幾次大咬，可惜時機把握唔到，最終打龜收場。
約五點幾，離我十米左右的魚友用手絲上咗條黃立倉，約25cm，唔肯定係咪放生魚。黃立倉之後就再見唔到有其他人有上魚，望一望天文台，原來差不多轉流，可能位置唔就，所以靜晒，得返泥鯭。太陽落山後，連泥鯭都走埋，約7點半執野走人。
總括而言，三家村碼頭算係唔錯嘅釣點，水質都ok，日頭都有大魚（唔知同放生魚有冇關），不過近岸水淺，我諗最多７、８尺，而且近岸易掛底，最好投出些少。另外，唔知係咪錯覺，離岸廿尺左右好似有跌級，投出去應該唔錯。
